ЭИК Кыргызстанда бизнести жана инвесторлорду коргоо кепилдиктерин күчөтүүгө чакырды

Жыйынга ошондой эле Кыргыз Республикасынын Жогорку Кеңешинин Төрагасынын биринчи орун басары Медербек Алиев, Жогорку Кеңештин депутаттары, Кыргыз Республикасынын Президентине караштуу Инвестициялар боюнча улуттук агенттиктин, Кыргыз Республикасынын Экономика жана коммерция министрлигинин, Кыргыз Республикасынын Башкы прокуратурасынын өкүлдөрү, ошондой эле башка мамлекеттик органдардын жана бизнес-ассоциациялардын өкүлдөрү катышты. Бизнес-коомчулуктун атынан сөз сүйлөгөн Аскар Сыдыков Консультативдик кеңештин ишинин улантылышын кубаттап, бул аянтчанын мамлекеттик органдар менен ишкер сектордун ортосундагы диалогду бекемдөөдөгү маанисин белгиледи. «Бизнес үчүн ишкерлердин жана инвесторлордун укуктарын коргоого байланышкан системалуу маселелерди ачык талкуулоого мүмкүнчүлүк берген туруктуу жана натыйжалуу аянтчанын болушу абдан маанилүү. Биз Консультативдик кеңештин активдүү ишинин жанданышын кубаттайбыз жана өлкөнүн инвестициялык жана ишкердик климатын жакшыртууга багытталган чечимдерди ишке ашырууга катышууга даярбыз», — деп белгиледи Аскар Сыдыков. Жыйындын жүрүшүндө ЭИК бизнес-коомчулук тарабынан иштелип чыккан бир катар сунуштарды берди. Атап айтканда, ченемдик укуктук актыларды иштеп чыгууда жана кабыл алууда мыйзамдардын талаптарынын сакталышына көзөмөлдү күчөтүү сунушталды. Бул коомдук талкуунун мөөнөттөрүн сактоону, жөнгө салуучу таасирди талдоону (ЖТТ) жүргүзүүнү, ошондой эле ченем жаратуу процессине бизнес өкүлдөрүнүн толук кандуу катышуусун камсыз кылууну камтыйт. Ченемдик укуктук актылардын долбоорлорун ак ниет атаандаштыктын жана рыноктук экономиканын принциптерине шайкештиги боюнча баалоо зарылдыгына да өзгөчө көңүл бурулду. ЭИК ошондой эле ишкердик субъекттери үчүн кошумча милдеттенмелерди караган прокурордук чаралардын айрым актыларын аткаруу практикасы боюнча маселени көтөрдү. Бизнес өкүлдөрү айрым талаптарды аткаруунун мүмкүнчүлүгү жана алардын колдонуудагы мыйзамдарга шайкештиги боюнча суроолор менен үзгүлтүксүз кайрылып турары белгиленди. Ишкерлерди укук коргоо органдарынын негизсиз басымынан коргоо маселелерин талкуулоонун алкагында ЭИК мыйзамсыз кылмыш иштерин козгоонун, негизсиз кармоолордун, камакка алуунун, документтерди алып коюунун жана бизнестин ишмердүүлүгүнө терс таасирин тийгизген башка аракеттердин натыйжасында өлкөнүн экономикасына келтирилген экономикалык зыянды талдоону сунуштады. Мындан тышкары, ишкерлердин менчик укуктарын коргоого багытталган Кыргыз Республикасынын Президентинин жарлыктарын мындан ары да ишке ашыруунун зарылдыгы белгиленди. Анын ичинде «экономикалык кылмыштар боюнча бир тергөө органы» принцибин киргизүү жана укук коргоо, фискалдык жана контролдоочу органдардын ишинин натыйжалуулугун баалоодо сандык көрсөткүчтөрдөн баш тартуу маселеси белгиленди. Дагы бир сунуш катары узак убакыттан бери процессуалдык жактан жыйынтыкталбай келе жаткан экономикалык багыттагы кылмыш иштерине мониторинг жүргүзүү сунушталды. Бизнестин пикиринде, мындай жагдайлар ишкерлер үчүн укуктук белгисиздикти жаратып, чарба жүргүзүүчү субъекттерге мындан ары да басым көрсөтүлүү тобокелдигин сактап калат. Эл аралык ишкерлер кеңеши Консультативдик кеңештин жыйынында сунушталган Иш-чаралар планын колдоорун билдирип, аны мамлекеттик органдар жана бизнес-коомчулуктун башка өкүлдөрү менен биргеликте практикалык ишке ашырууга көмөк көрсөтүүгө даяр экенин ырастады. «Менчик укуктарын натыйжалуу коргоо, мыйзам үстөмдүгү жана жөнгө салуунун алдын ала божомолдоого мүмкүн болушу инвестицияларды тартуунун, ишкердикти өнүктүрүүнүн жана Кыргызстандын туруктуу экономикалык өсүшүнүн негизги шарттары болуп саналат», — деп белгиледи Аскар Сыдыков жыйындын жыйынтыгы боюнча.