ЭИК интеллектуалдык менчик укуктарын коргоо боюнча семинардын котолордук уюштуруучусу болду

10-декабрда Бишкекте Кыргыз Республикасынын Илим, жогорку билим берүү жана инновациялар министрлиги «Городисский жана Өнөктөштөр» юридикалык фирмасы менен биргеликте Эл аралык Ишкер Кеңештин өнөктөштүгү менен уюштурган «Атаандаштык артыкчылыктын негизи катары интеллектуалдык активдер» аттуу семинар болуп өттү. Иш-чара Министрликтин Инновациялык борборунда болуп, бизнестин, академиялык чөйрөнүн жана мамлекеттик органдардын 100дөн ашык өкүлүн бириктирди. Куттуктоо сөзү менен Кыргыз Республикасынын Илим, жогорку билим берүү жана инновациялар министринин орун басары Кемель Садыков, ЭИКтин аткаруучу директору Аскар Сыдыков жана «Городисский жана Өнөктөштөр» филиалынын директору Чолпон Дооталиева чыгып сүйлөштү. Интеллектуалдык активдер — бренддер, технологиялар, иштеп чыгуулар, санарип мазмун — бизнестин атаандаштыкка жөндөмдүүлүгүн жогорулатуунун негизги куралына айланып жатканы жана натыйжалуу укуктук коргоо компаниялардын туруктуулугуна жана алардын инвестицияларды тартуу жөндөмдүүлүгүнө түздөн-түз таасир этери белгиленди. Программанын алкагында товардык белгилерди каттоо жана коргоо, бажы реестрлери менен иштөө, контрафакт жана параллелдүү импорт тобокелдиктери, интернетте жана маркетплейстерде укук бузууларга каршы аракеттенүү жолдору, жасалма интеллектти колдонуунун укуктук аспектилери, ошондой эле лицензиялоо, укуктарды өткөрүп берүү, франчайзинг жана интеллектуалдык активдерди күрөөгө коюу практикасы маселелери каралды. Эксперттер бренддерди коргоо, иштеп чыгууларды патенттөө жана интеллектуалдык ишмердиктин натыйжаларын монетизациялоо боюнча реалдуу кейстерди тааныштырышты. Семинар тажрыйба алмашуу жана интеллектуалдык активдерди башкаруунун заманбап куралдарын талкуулоо үчүн платформа болду. ЭИК бизнес менен мамлекеттин ортосундагы диалогду бекемдеген жана Кыргызстандын инновациялык экономикасын өнүктүрүүгө багытталган демилгелерди колдоону улантат.