ESG — туруктуу өнүгүү жана бизнестин тобокелдигин башкаруу куралы катары

2026-жылдын 27-апрели эл аралык Ишкер Кеңештин аткаруучу директору Аскар Сыдыков 23-25-апрель күндөрү Астанада өткөн Аймактык Экологиялык Саммиттин (RES 2026 Expo) алкагындагы жумушчу сессияда сүйлөдү. Иш-чара Борбордук Азия өлкөлөрүнүн, эл аралык уюмдардын жана эксперттик коомчулуктун өкүлдөрүн бириктирип, туруктуу өнүгүү жана аймактык кызматташтык маселелерине арналды. ЭИКтин жетекчиси аймактык ESG кызматташтыгынын ийгиликтүү практикалары, ошондой эле Кыргызстандын бизнес-коомчулугунун аларды өнүктүрүүгө болгон көз карашы жөнүндө айтып берди. «Инвесторлордун көз карашы боюнча, Борбордук Азия аймагы бирдиктүү рынок, бирдиктүү инвестициялык мейкиндик катары каралат, жана чечимдер улам көбүрөөк аймактык деңгээлде кабыл алынууда. Ошондуктан туруктуулук экономикалык факторго айланууда», — деп белгиледи Аскар Сыдыков өз сөзүндө. ЭИК жүргүзгөн сурамжылоонун натыйжалары боюнча, Кыргызстандын бизнеси ESGди өнүктүрүү куралы катары карайт, мында негизги драйверлер — инвесторлор жана өнөктөштөр. ESGди бизнес-практикага интеграциялоо каржылоого жана жаңы рынокторго жетүүнү кеңейтүүгө, ошондой эле компаниялардын атаандаштыкка жөндөмдүүлүгүн жогорулатууга көмөктөшөт. «Бизнес бүгүн ESG кайрымдуулук эмес, натыйжалуу тобокелдикти башкаруу экенин түшүнүп жатат», — деп белгиледи Аскар Сыдыков. Сессиянын алкагында ошондой эле «жашыл» стимулдарды жайылтуу боюнча Борбордук Азия платформасынын ишинин натыйжалары тааныштырылды. Платформа Кыргызстандын, Казакстандын жана Өзбекстандын бизнесин, экологиялык жана эксперттик коомчулугун бириктирип, практикалык тажрыйба алмашуу, чечимдерди иштеп чыгуу жана эл аралык ESG-мамилелерди аймактык контекстке ыңгайлаштыруу үчүн платформа катары кызмат кылат. Платформа ESGди киргизүүнүн практикалык куралдарын түзүүгө жана аймактагы бизнес үчүн тоскоолдуктарды азайтууга багытталган. Саммиттин жыйынтыгы боюнча Борбордук Азиянын мамлекет башчыларынын экология жана туруктуу өнүгүү тармагындагы аймактык кызматташтыкты өнүктүрүүгө багытталган «Борбордук Азиянын экологиялык ынтымагы» аттуу Биргелешкен декларациясы кабыл алынды.