Кыргыз Республикасындагы Түркия Республикасынын Элчиси менен бизнес-коомчулуктун жолугушуусу болуп өттү

2026-жылдын 16-июнунда Эл аралык Ишкер Кеңеш (ЭИК) Түркия-Кыргыз ишкерлер кеңеши (ТҮКИД) менен биргеликте ЭИКтин мүчө-компанияларынын өкүлдөрүнүн Кыргыз Республикасындагы Түркия Республикасынын Өзгөчө жана Ыйгарым Укуктуу Элчиси мырза Мекин Мустафа Кемал Өгем менен жолугушуусун уюштурду. Жолугушууга ТҮКИДдин төрагасы Уфук Индже, түрк жана кыргыз бизнесинин өкүлдөрү, ошондой эле Түркиянын көз каранды эмес өнөр жайчылары жана ишкерлер ассоциациясынын (MÜSİAD) мүчөлөрү катышты. Жолугушууга банк жана финансы секторунда, тоо-кен өнөр жайында, курулушта, өндүрүштө, фармацевтикада, саламаттык сактоодо, туризмде, консалтинг жана юридикалык кызматтарда, соодада жана экономиканын башка тармактарында иштеген компаниялардын өкүлдөрү катышты. Иш-чара эки өлкөнүн ортосундагы соода-экономикалык жана инвестициялык кызматташтыкты өнүктүрүү маселелери боюнча Кыргызстан менен Түркиянын бизнес-коомчулугунун өкүлдөрүнүн ортосундагы ачык диалог үчүн платформа болду. Жолугушуунун алкагында Кыргыз Республикасындагы Түркия Республикасынын Соода өкүлчүлүгүнүн өкүлдөрү кыргыз-түрк соода-экономикалык мамилелеринин учурдагы абалына, кызматташтыктын келечектүү багыттарына, инвестициялык мүмкүнчүлүктөргө жана бизнести колдоо механизмдерине арналган презентация көрсөттү. Презентацияда 2025-жылдын жыйынтыгы боюнча Кыргызстан менен Түркиянын ортосундагы эки тараптуу соода жүгүртүүсү 1,645 млрд АКШ долларына жеткени жана бул 2021-жылга салыштырмалуу дээрлик эки эсеге өскөндүгү белгиленди.
Ошондой эле Кыргызстанда түрк капиталы бар болжол менен 300 компания иштеп жаткандыгы жана Түркиянын Кыргызстан экономикасына түз инвестицияларынын жалпы көлөмү болжол менен 1,53 млрд АКШ долларын түзгөндүгү белгиленди. Берилген маалыматтар түрк бизнесинин өлкөнүн экономикасын өнүктүрүүдөгү жана эки тараптуу экономикалык кызматташтыкты андан ары бекемдөөдөгү маанилүү ролун көрсөтөт. Эки өлкөнүн ортосундагы туристтик байланыштарды өнүктүрүүгө өзгөчө көңүл бурулду. 2025-жылы Түркияга дүйнөнүн ар кайсы өлкөлөрүнөн болжол менен 64 миллион турист барганы, ал эми Кыргызстандан келген туристтердин саны акыркы үч жылда 17%га өсүп, 199 280 адамга жеткени белгиленди. Катышуучулардын өзгөчө кызыгуусун суроо-жооп сессиясы жаратты, анын жүрүшүндө компаниялардын өкүлдөрү мырза Элчи менен бизнести жүргүзүүнүн актуалдуу маселелерин, соода байланыштарын кеңейтүү келечегин, биргелешкен инвестициялык долбоорлорду ишке ашырууну, ошондой эле Кыргызстан менен Түркиянын ортосундагы экономикалык өнөктөштүктү андан ары бекемдөө маселелерин Элчи менен түздөн-түз талкуулоо мүмкүнчүлүгүнө ээ болушту.
Жолугушуунун катышуучулары эки тараптуу кызматташтыкты андан ары өнүктүрүү, өз ара соданы кеңейтүү, инвестицияларды тартуу жана экономиканын ар кайсы тармактарында жаңы биргелешкен долбоорлорду ишке ашыруу үчүн жогорку потенциалды белгилешти. Мындай жолугушууларды өткөрүү Кыргызстандын бизнес-коомчулугу менен чет өлкөлүк өнөктөштөрдүн ортосундагы конструктивдүү диалогду өнүктүрүү, ишкердик баарлашуу үчүн кошумча мүмкүнчүлүктөрдү түзүү жана эл аралык кызматташтыкты бекемдөө боюнча ЭИКтин ишинин маанилүү бөлүгү болуп саналат. ЭИК Кыргыз Республикасындагы Түркия Республикасынын Элчилигине, Түркия-Кыргыз ишкерлер кеңешине (ТҮКИД) жана жолугушуунун бардык катышуучуларына кыргыз-түрк экономикалык байланыштарын андан ары өнүктүрүүгө болгон конструктивдүү диалогу жана кызыгуусу үчүн ыраазычылык билдирет.