ЭДС Дубай эл аралык палатасы менен кызматташуу мүмкүнчүлүктөрүн талкуулады

Эл аралык ишкерлер кеңешинин башчысы Аскар Сыдыков Dubai International Chamber (Дубай эл аралык палатасы) уюмунун Эл аралык өкүлчүлүктөр департаментинин Жакынкы Чыгыш жана Евразия боюнча аймактык директору Абдулла Бакер менен жолугушуу өткөрүштү.

Жолугушуунун жүрүшүндө тараптар Кыргызстан менен Бириккен Араб Эмираттарынын ортосундагы ишкердик кызматташтыкты өнүктүрүү, бизнес-делегациялардын өз ара сапарларын уюштуруу, эки өлкөнүн ишкерлеринин ортосунда түз байланыштарды түзүү, ошондой эле стартаптарды жана инновациялык ишкердикти колдоо жаатында кызматташуу мүмкүнчүлүктөрүн талкуулашты.

Ишкердик байланыштарды кеңейтүүгө, тажрыйба алмашууга, компанияларга потенциалдуу өнөктөштөрдү табууга жана жаңы рынокторго чыгууга көмөк көрсөтүү маселелерине өзгөчө көңүл бурулду.

Dubai International Chamber Dubai Chambers түзүмүнө кирет жана эл аралык соода-экономикалык байланыштарды өнүктүрүү, чет өлкөлүк инвестицияларды тартуу, ошондой эле Дубайдагы компаниялардын эл аралык рынокторго чыгуусуна колдоо көрсөтүү менен алектенет. Эл аралык өкүлчүлүктөр тармагы аркылуу палата ишкердик байланыштарды түзүүгө, инвестициялык мүмкүнчүлүктөрдү издөөгө, бизнес-миссияларды уюштурууга жана ар кайсы өлкөлөрдүн ишкерлеринин ортосунда өнөктөштүк мамилелерди өнүктүрүүгө көмөктөшөт.

Жолугушуунун жыйынтыгында тараптар мындан аркы кызматташтыкты өнүктүрүүгө жана Кыргызстан менен Дубайдын ортосундагы ишкердик байланыштарды чыңдоого багытталган биргелешкен демилгелерди ишке ашыруу мүмкүнчүлүктөрүн карап чыгууга кызыкдар экендиктерин билдиришти.